N E W S F E E D S >>>

John Horne Index Other Caithness Poets

Caithness Dialect Dictionary

Arts

John Horne

Div ye mind yer Kaitness hoosie wi its wheezy but and ben,
A dowgie sleepin by e' fire, aside a clockin hen;
A dresser set wi bowlies, an a bandbox on a kist,
A cowgie fu o sooans, an' a stoolie wi' a list?
Div ye mind, boy Eh? Div ye mind?

Div' ye mind e' greasy grunter wi' his muckle flappan loogs,
An e' chuckens fechtin roond ye for e' sweelans o' e' moogs?
A slated blockie, on a bool, spread dryan in e sun,
While e duekies trail'd his heid-piece roond and roond e' byre for fun
Div ye mind, boy Eh? Div ye mind?

Div' ye mind e' Knotty Club wi its game and ragged band,
Fa's clubs wis bandaged kail-runs or anything at hand?
Noo and then a tae wis opened wi' a whistle fae e' ba',
An e' linin o' a pockad wis pit roond it wi' a straw.
Div ye mind, boy Eh? Div ye mind?

Div ye mind e' whitened lirkie wi' its mooldy, earthy scent,
An e' blinkin faces roond ye, tryan hard til look intent?
On e' blessed Bible pages, ye drew sheep and stirkies lean,
An ye cut initials in e' pew fan "Thirdly" shut his een.
Div ye mind, boy Eh? Div ye mind?

Div ye mind e' jolly schooldays fan ye trowed till play "Skyhigh"
And ye tumbled in a burnie, and skelpt aboot til dry?
Bit yir mithir spread ye on her lap an' exercised her han',
Then chicked ye in yur baba 'cause ye wisna fit till stan'
Div ye mind, boy Eh? Div ye mind?

Div ye mind e' day ye traivelled wi yur faither in a cairt,
Far fae hoosie, kirk and burnie, in e' world til act yir pairt?
Hoo ye turned an looked an looked again, wi a prayer in yeer face,
An vowed til play e' man and bring them no disgrace?
Div ye mind, boy Eh? Div ye mind?

Taken from a book called "Caithnessian Poems and Plays" by John Horne.